حوادث جلسات سرية وعبارات غير مفهومة.. كواليس أغرب دعوى خلع أمام محكمة الأسرة محكمة الأسرة - صورة أرشيفية تصوير : آخرون محكمة الأسرة - صورة أرشيفية

في واقعة شهدتها محكمة الأسرة، تقدمت سيدة ثلاثينية بدعوى خلع ضد زوجها بعد 3 شهور من زواجهما، مبررة طلبها بأن حياتها الزوجية تحولت إلى معاناة يومية بعدما اكتشفت أن الزوج يقضي معظم وقته في ممارسة طقوس روحانية غريبة، محولًا المنزل إلى ما يشبه المعبد.

وقالت الزوجة في دعواها إنها لم تكتشف حقيقة ميول زوجها إلا بعد الزواج:«في الخطوبة كان شخص عادي، مثقف وبيتكلم عن الطاقة الإيجابية والتنمية البشرية، وماخدتش كلامه على محمل الجد، لكن بعد الجواز اكتشفت إنه بيقفل على نفسه الأوضة بالساعات، يطفي النور، يولع شمع بألوان مختلفة، وينشر بخور في كل مكان، كان يقعد يردد عبارات غريبة ويمسك أحجار ويقول إنها بتحميه من الطاقة السلبية».

وأضافت: «الغريب إنه حاول يجرني للموضوع، كان بيقولي لازم نمارس الطقوس دي سوا، ويطلب مني أردد وراه كلمات مش مفهومة، ولما رفضت، اتخانق معايا واتهمني إني مش فاهمة قيمة اللي بيعمله».

الزوجة أوضحت أن الأمر لم يتوقف عند مجرد ممارسة عادات خاصة، لكنه سيطر على كل تفاصيل حياتهم:«خصص أوضة كاملة في الشقة للجلسات دي، وعلق فيها رسومات وأحجار، وبقى يقضي معظم وقته فيها، حتى المناسبات العائلية والأعياد ما بقاش بيشارك فيها، وكل كلامه عن الطاقات والروحانيات، دا غير محاولاته المستمرة لخلق طقوس يعرف بيها ايه اللي هيحصله في المستقبل، حسيت إن البيت اتحول لمكان مرعب وأنا مش قادرة أعيش بالشكل ده».

وأكدت الزوجة أنها حاولت الصبر حفاظًا على بيتها، لكن خوفها على نفسها جعلها تتخذ قرار اللجوء للمحكمة:«انا طول عمري مش مؤمنة بأي افكار تعزل الإنسان عن الواقع بتاعه، وربنا هو مقدر الأقدار، وانا مش عارفة استمر مع شخص بيحاول يتحدى القدر».

• إجراءات دعوى دعوى الخلع
• إحالة دعوى
• اخبار الاسرة
• اخبار محكمة استئناف القاهرة
• اخبار محكمة الأسرة
• اخبار محكمة الاسرة
• خلع
• دعوى طلاق
• طلاق
• محكمة الاسرة